Pilipinas pumalag sa pamimilit ng China na may hurisdiksyon ito sa karagatan ng Batanes

Pinalagan ng pamahalaan ang paggi-giit ng Chinese Embassy na mayroon silang sovereign rights at hurisdiksyon sa karagatang malapit sa Batanes.

Ito ay matapos matuklasan ang isang Chinese research vessel, ang JIA HAI KE 7, na iligal na nag-o-operate sa layong tatlumpu’t pitong nautical miles northwest ng Itbayat, Batanes.

Ayon sa DFA, ang nasabing lokasyon ay pasok na pasok sa Exclusive Economic Zone o EEZ ng Pilipinas.

Binigyang-diin ng kagawaran na sa ilalim ng Article 246 ng UNCLOS, kinakailangan ang pahintulot ng Pilipinas bago magsagawa ng anumang Marine Scientific Research ang mga dayuhang barko sa ating EEZ.

Walang hininging permiso ang Tsina, kaya iligal at walang awtorisasyon ang aktibidad ng kanilang barko sa lugar.

Kinumpirma naman ng Philippine Coast Guard na matagumpay na naitaboy ng BRP Teresa Magbanua at ng isang patrol aircraft ang barko ng Tsina palabas ng teritoryo ng bansa.

Muling nanawagan ang DFA sa Beijing na tuparin ang obligasyon nito sa ilalim ng international law at iwasan ang mga aksyong nakakasira sa tiwala ng dalawang bansa. (DDC)