COVER UP SINISILIP SA RAID NG PNP – HPG SA WAREHOUSE NA MAY NADATNANG MGA CUSTOMS PERSONNEL
Dalawang bersyon ng kwento ang lumalabas ngayon sa likod ng nangyaring raid kamakailan sa isang warehouse na naglalaman ng mga iligal na sigarilyo sa Sta. Maria, Bulacan.
Palaisipan pa rin sa publiko kung ano ba talaga ang totoong nangyari sa pagitan ng mga ahente ng Bureau of Customs at mga tauhan ng Metro Manila Regional Highway Patrol Group.
Ayon sa isang social media post ng veteran broadcaster Ramon Tulfo, hinaras at dinisarmahan ang mga ahente ng BOC nang kinukumpiska ng HPG-NCR ang mga pinagbabawal na sigarilyo mula sa isang warehouse sa Bulacan.
Ngunit taliwas ito sa spot report na nilabas ng HPG-NCR kaya may mga spekulasyong nagkaroon ng cover-up sa nangyayari.
Lumalabas sa ulat na meron ilang indibidwal na mula sa mga kawani ng BOC ang umano’y sangkot sa pagbebenta ng iligal na sigarilyo.
Ang sinalakay na warehouse ng HPG-NCR ay katabi lamang ng isang pasilidad na nagsisilbing condemnation site ng BOC para sa mga nasabat at nakumpiskang kontrabando.
Naging usap-usapan na ang HPG-NCR ay binaliktad at pinalabas na masama sa mata ng publiko sa pagtupad sa kanilang sinumpaang tungkulin.
Hindi ito ang unang pagkakataon na nasangkot ang BOC sa kontrobersya o kaya sa mga alegasyon ng iligal na gawain ang mga kawani nito.
Nasibak noon sa kanyang pwesto si Customs Intelligence and Investigation Service (CIIS) field station chief Paul Oliver Pacunayen habang isinasagawa ang masusing imbestigasyon ng BOC sa alegasyon ng korapsyon laban kay Pacunayen.
Si Pacunayen ay kasama sa nabanggit sa liham na ipinadala kay Pangulong Ferdinand “Bongbong” Marcos Jr. ng mga concerned officials, employees, at stakeholders ng BOC kung saan inireklamo ang pagbabalik ng talamak na ismagling sa pantalan.
Nabanggit din sa nasabing liham si CIIS Director Thomas Narcise.
Mahigit kalahating taon na ang lumipas pero walang pa ring nilalabas na kahit anong resulta tungkol dito na pinangako noon ni Customs Commissioner Ariel Nepomuceno na kanyang inanunsyo pa pati ang nararapat na kaparasuhan kung kinakailangan.
Si dating Deputy Commissioner for Intelligence Romy Rosales ang tinalagang mamuno sa imbestigasyon subalit nagbitiw na ito sa pwesto.
Ano na kaya ang nangyari sa dalawang taong ito? Nais ni Juan dela Cruz na malaman mula kay commissioner ang update sa kanila. Hindi kaya nagkaroon na rin siya amnesia kaya pati na rin siya ay nakalimot? O kaya nagkibit-balikat na lamang siya.
