DA nagpatupad ng import ban sa mga hayop mula s apitong bansa dahil sa FMD

Nagpatupad ang Department of Agriculture ng temporary import ban sa mga buhay na hayop at piling produktong hayop mula sa pitong bansa sa Middle East at Europe.

Ito ay matapos makumpirma ang mga kaso ng foot-and-mouth disease o FMD.

Saklaw ng import suspension ang mga bansang Azerbaijan, Bahrain, Cyprus, Iraq, Israel, Kuwait, at Palestine.

Sa ilalim ng Department Circular No. 39 na nilagdaan ni Agriculture Secretary Francisco “Kiko” Tiu Laurel Jr., ipinagbabawal ang pagpasok sa bansa ng mga buhay na baboy, baka, kalabaw at iba pang hayop na madaling kapitan ng FMD.

Bawal din ang pag-aangkat ng sariwang karne, casings, tallow, hooves, sungay at semilya ng hayop na nagmumula sa mga apektadong lugar.

Layunin ng DA na maprotektahan ang industriya sa bansa laban sa isa sa mga pinaka-nakakahawang sakit ng mga hayop sa mundo. (DDC)