Alok na ceasefire ni Cayetano sinopla ni Lacson

Tinabla ni Senator Panfilo Lacson ang alok na ceasefire matapos niyang ibuking ang mga anomalya sa infrastructure projects sa Taguig City na balwarte ni Senate Minority Leader Alan Peter Cayetano.

Tinawag ni Lacson na galaw-ipokrito ang alok na “ceasefire” ng hindi niya pinangalanang tao na walang habas aniyang umatake sa kaniya.

Tanong ni Lacson, anong uri ng tao ang magde-deklara ng giyera na toy gun lang ang dala at laway ang bala pero kapag nakompronta ng bomba ay pabulong na hihirit ng ceasefire.

Ayon sa pahayag ng senador, ipinaabot ang alok na ceasefire matapos na ilantad ng kaniyang tanggapan ang mga ebidensya ng iregularidad sa slope protection at iba pang mga proyekto sa Taguig City.

Pagkatapos maisumite sa Office of the Ombudsman ang mga nakalap na ebidensya at testimonya, sinabi ni Lacson na ilalahad niya ang mga detalye sa pagdinig ng Senate Blue Ribbon Committee hinggil sa mga flood control project. (DDC)