Pinoy na biktima ng illegal recruitment hinarang sa NAIA

Hindi pinayagang makaalis ng bansa ang isang Pinoy matapos matuklasan na ilegal itong bibiyahe sa Moscow, Russia para magtrabaho.

Ayon kay BI Commissioner Joel Anthony Viado ang pasaherong si alyas “John,” ay aalis dapat ng bansa patungong Hong Kong pero naghinala ang mga immigration officer dahil sa pabago-bago nitong pahayag at mga dokumento.

Sa inisyal na panayam, sinabi ng pasahero na magbabakasyon siya ng limang araw sa Hong Kong.

Gayunman, sa secondary inspection, nadiskubre na gagamitin lang niya ang Hong Kong bilang transit point at ang aktwal niyang destinasyon ay sa Moscow, Russia.

Kalaunan, umamin si alyas “John” na siya ay ni-recruit sa pamamagitan ng Facebook at WhatsApp at pinangakuang susweldo siya 2,700 US Dollars.

Pero dahil sa kawalan ng employment documents at overseas employment clearances ay hindi ito pinayagan ng BI na makalabas ng bansa. (DDC)