22 Pinoy trafficking victims sa Cambodia nakauwi na sa bansa
Ligtas na nakabalik ng bansa ang 22 Pilipinong biktima ng human trafficking mula sa Cambodia ayon sa Department of Migrant Workers (DMW).
Ang gobyerno ng Pilipinas ang sumagot sa kanilang repatriation bilang tugon sa direktiba ni Pangulong Ferdinand R. Marcos Jr. na protektahan at asistehan ang overseas Filipino workers at iba pang nagkaproblemang Pinoy.
Sa kanilang pag-uwi, agad silang inasikaso ng Manila International Airport Authority Medical Team para sa health assessment at medical assistance. Nagkaloob ang OWWA ng transportasyon at pansamantalang matutuluyan habang magbibigay naman ng legal assistance ang DMW Migrant Workers Protection Bureau at mga miyembro ng Inter-Agency Council Against Trafficking. Pagkakalooban din ng financial at welfare support upang tulungan silang makabangon at itayong muli ang kanilang mga buhay.
Ang repatriates ay sinamahan ni DMW Undersecretary Felicitas Q. Bay, sa kanilang pagdating sa NAIA Terminal 1 sa Pasay City ng umaga ng Miyerkules via Philippine Airlines flight PR 2622 mula sa Techo International Airport sa Phnom Penh. Sinalubong sila ni DMW Assistant Secretary Jerome Alcantara kasama ang teams ng DMW, Overseas Workers Welfare Administration (OWWA), at NAIA Task Force Against Trafficking.
Naisagawa ang posibleng repatriation sa mga koordinadong hakbang ng DMW Rapid Response Team sa Cambodia, Migrant Workers Office sa Singapore, at ng Philippine Embassy in Phnom Penh, na sumasalamin sa tuloy-tuloy na pangako ng gobyerno na iuwi ng ligtas ang mga distressed Pinoy at suportahan sila sa daan ng kanilang pagbangon at reintegrasyon. (Bhelle Gamboa)
