Las Piñas LGU may bagong karagdagang sasakyan para sa operasyon kalinisan at kaayusan

Kaagad gagamitin ng Pamahalaang Lungsod ng Las Piñas partikular ang City of Environment and Natural Resources Office (CENRO) ang karagdagang dalawa pang bagong kagamitan para sa mga operasyong nagpapanatili ng kalinisan at kaayusan ng mga komunidad.

Minadali ni Mayor April Aguilar ang pagbili ng mga makinaryang ito para agarang maisagawa ang paglilinis sa mga creek o estero at daluyan ng tubig sa lungsod upang maiwasan na ang mabilis na pagbabaha sa panahon ng tag-ulan.

Pinabasbasan muna ang bagong sasakyan na Hyundai Wheel Loader na ginagamit para sa pagkuha, pagdadala, at pagtatapon ng mabibigat na materyales tulad ng lupa, buhangin, at basura.

Habang ang Hyundai Crawler Excavator Long Arm ay ginagamit namin sa paghuhukay ng mga kanal, pagtanggal ng mga harang o sagabal, at iba pang mabibigat na gawain na hindi kayang gawin ng ordinaryong kagamitan.

Nagpakita ng suporta sa proyektong ito sina Vice Mayor Mel Aguilar, Councilors Alelee Aguilar, Macky Saito, Mac Mac Santos, at SK Federation President Rey Angelo Reyes, kasama ang mga department heads, kawani, at tauhan ng CENRO.

Ang Las Piñas ay patuloy na namumuhunan sa mas epektibong serbisyo para sa bawat Las Piñero. (Bhelle Gamboa)