DSWD, LTFRB sinimulan na ang data cleansing sa listahan ng PUV drivers

Dahil marami pa ring PUV drivers ang hindi pa nakatatanggap ng cash relief assistance mula sa DSWD, inumpisahan na ang paglilinis sa listahan ng pangalan ng mga benepisyaryong tsuper.

Ikinasa ng DSWD at LTFRB sa tulong ng mga kinatawan mula DICT ang Data Cleansing Session para maiayos ang listahan.

Sa naturang aktibidad, isinailalim sa pagsusuri ang listahan para makabuo ng verified database ng PUV drivers.

Ito ay para matiyak na tama ang mga detalye, maiwasan ang doble-dobleng datos at para mapabilis ang paghahatid ng cash assistance sa mga nararapat na beneficiaries.

Una nang sinabi ng DSWD na marami ang dobleng pangalan sa listahan ng mga tsuper lalo na sa panig ng TNVS drivers. (DDC)