Carnapping suspect arestado, nakaw na sasakyan nabawi sa Cavite

Naaresto ng mga operatiba ng Pasay City Police Station at ng Highway Patrol Group (HPG) ang isang hinihinalang karnaper at nabawi ang isang nakaw na sasakyan sa Cavite kagabi.

Narekober sa suspek na si alyas Tim ang sinasabing nakaw na Hyundai KONA (CAT 6206) matapos siyang arestuhin ng otoridad sa Village Paliparan 1, Dasmariñas Cavite.

Batay sa report ng pulisya, kinarnap o tinangay ang naturang sasakyan noong January 21, 2024 ng alas-10:00 ng gabi sa parking area ng isang casino sa Brgy. 183, Pasay City.

Dalawang hindi kilalang lalaki ang bumaba mula sa Mitsubishi Xpander kung saan tinarget ang Hyundai KONA at tinangay ito.

Sa isinagawang follow-up operation, nadiskubre ng mga pulis na ang nakaw na sasakyan ay hawak ng suspek at hinihinalang ibinibenta nito.

Bukod dito, narekober din ng otoridad sa suspek ang Mitsubishi Xpander na ginamit sa krimen kung saan nakuha sa loob ng sasakyan ang isang gun replica (airsoft) na nasa loob ng itim na sling bag sa ilalim ng driver’s seat.

Nasa kustodiya ng Pasay City Police Station ang nadakip na si alyas Tim upang isailalim sa masusing imbestigasyon at pagsasampa ng kaukulang kaso laban dito. (Bhelle Gamboa)