3 sugatan sa pagbagsak ng mga poste sa Binondo Maynila
Sugatan ang tatlong katao habang ilang mga sasakyan ang napinsala makaraang magbagsakan ang mga poste sa kahabaan ng Quintin Paredes sa Binondo, Maynila.
Rumesponde ang Rescue Unit at Emergency Medical Services ng Manila Disaster Risk Reduction and Management Office sa lugar na pinangyarihan ng insidente.
Ayon sa Manila DRRMO, 3 pasyente ang nagtamo ng mga gasgas at galos na agad namang binigyan ng paunang lunas.
Nagtulung-tulong naman ang mga kawani ng Manila DRRMO, Meralco at MMDA para magsagawa ng clearing operation.
Pansamantala ay isinara sa daloy ng traffic ang kahabaan ng Quintin Paredes.
Inaalam pa ang dahilan ng pagtumba ng mga poste. (DDC)
