9 sugatan sa pagbagsak ng bubong ng food park sa Lapu-Lapu City, Cebu
Siyam ang sugatan nang bumagsak ang bubong sa isang bagong bukas na food park sa Lapu-Lapu City, Cebu.
Ayon sa City Disaster Risk Reduction and Management Office ng lungsod, gumuho ang bubungan ng food park sa Sitio Bagumbayan 2, Barangay Maribago dahil sa naranasang malakas na buhos ng ulan.
Kumakain sa Mactan Lifestyle Park ang mga biktima ng mangyari ang aksidente.
Nagtamo ng galos at sugat sa kanilang katawan ang mga nabagsakan ng bubong at kinailangang dalhin sa ospital.
Sa inisyal na imbestigasyon ng Lapu-Lapu City Rescue,
ang gitnang bahagi ng bubong ng food park ang bumagsak na gawa sa bakal at plastic sheets.
Nakitaan dun umano ng problema ang disenyo ng bubong at kailangan itong maimbestigahan ng structural engineers ng Office of the Building Official. (DDC)
