Gerald Anderson, Coast Guard personnel namigay ng tulong sa mga mangingisda sa Floating Community Pantry
Tumulong ang aktor na si Gerald Anderson sa pamamahagi ng pagkain ng mga tauhan ng Philippine Coast Guard (PCG) sa kanilang Floating Community Pantry.
Umaga ng Huwebes (April 29), naglayag sakay ng bangka si Anderson na isa ring lieutenant commander ng PCG Auxiliary (PCGA) kasama ang mga tauhan ng PCG Sub-Station Botolan, Zambales.
Dala nila ang 100 food packs na naglalaman ng tig-limang kilong bigas, tig-apat na pirasong canned goods, at tig-apat na pakete ng instant noodles.
Nilagyan din nila ito ng ilang pakete ng instant coffee panlaban sa antok ng mga mangingisda sa gitna ng karagatan.
Ayon kay Anderson, nakiisa siya sa pinasimulang ‘floating community pantry’ dahil nais niyang suportahan ang masisipag na mangingisdang tumutulong sa pagpapanatili ng sapat na suplay ng pagkain sa munisipalidad.
