Gerald Anderson nagbigay ng mga materyales para sa itinatayong sub-station ng Coast Guard sa Botolan, Zambales

Binisita ni Lieutenant Commander (LCDR) Gerald Anderson ng Philippine Coast Guard Auxiliary (PCGA) ang PCG Sub-Station Botolan na matatagpuan sa Zambales.

Isa ito sa pinakabagong sub-station ng PCG na pormal na inilunsad noong Abril 13, 2021, sa pangunguna ni Seaman First Class (SN1) Mar Azheron Marasigan bilang Team Leader.

Dala ni Anderson ang ilang construction materials, tulad ng semento, hollow blocks, at coco lumber para makatulong sa pagsasaayos ng gusali na nagsisilbing opisina ng mga deployed PCG personnel sa Botolan.

Sa kaniyang pagbisita, ipinahayag ng aktor ang suporta sa operasyon ng PCG Sub-Station Botolan.

Ayon kay LCDR Anderson PCGA, tiyak na mapapalawak ng nabanggit na Coast Guard unit ang seguridad sa katubigan ng Zambales kung saan karamihan sa mga residente ay nakadepende sa karagatan para sa maitaguyod ang kanilang pamilya.