Lalaking suspek sa pamba-blackmail arestado ng NBI

Inaresto ng mga tauhan National Bureau of Investigation (NBI) sa General Santos City ang isang lalaking suspek sa pamba-blackmail.

Ayon kay NBI Officer-In-Charge (OIC) Director Eric B. Distor bina-blackmail ng suspek na si Rosman Hadji Ibrahim ang biktima para mapilit itong makipagtalik sa kaniya.

Naaresto ang suspek sa ikinasang entrapment operation dahil sa paglabag sa RA 9262 o Anti-Violence Against Women and Children Act of 2004 in relation to RA 10175 o Cybercrime Prevention Act of 2012.

Ayon sa nagreklamo, nagkaroon sila ng relasyon ni Ibrahim mula 2017 hanggang 2020.

Nagpasya siyang makipaghiwalay dito noong December 2020 pero patuloy siya nitong pinadalhan ng mga mensahe.

Tinakot pa umano siya ni Ibrahim na ipakakalat ang mga hubad niyang larawan kapag hindi siya nakipagtalik sa suspek.

Doon na humingi ng tulong sa NBI ang biktima na agad namang nagkasa ng entrapment operation.