Sen. Go: Nandito lang si Tatay Digong

“Nandito lang si Tatay Digong”.

Ito ang sagot ng Malakanyang sa mga naghahanap sa pangulo matapos na dalawang ulit nang pagpapaliban sa kaniyang nakatakdang talk to the nation.

Sa mga larawan na ibinahagi ni Senator Bong Go, ipinakita nitong kasama niya si Pangulong Duterte at nagtatrabaho.

Paalala ni Go sa mga kritiko ng pangulo, huwag munang magdiwang dahil maayos ang kondisyon ng pangulo at “tambak ang trabaho”.

“Sa mga may masasamang Hangarin, Wag muna kayo mag celebrate!! Nandito lang si Tatay Digong. Tambak ang trabaho,” ayon kay Go.

Apela ni Go sa halip na magsisihan, ay tulungan na lamang ang pangulo upang malagpasan ang kasalukuyang krisis sa bansa.

Una rito ay muling kumalat ang hashtag na #nasaanangpangulo dahil sa hindi natuloy na public address nito.

May mga nagbahagi pa ng post na nakaranas umano ng mild stroke ang pangulo na agad namang pinabulaanan ng palasyo.