13 sakay ng lumubog na motorbanca sa Sangley Point, nailigtas ng Coast Guard

Nailigtas ng mga tauhan ng Philippine Coast Guard (PCG) ang 12 pasahero at boat captain ng lumubog na motorbanca sa bahagi ng Sangley Point, Cavite City.

Kabilang sa mga sakay ng motorbanca ang tatlong menor de edad.

Galing ng Cavite City ang motorbanka at patungo sa Pulang Lupa 1 sa Las Piñas City nang maapektuhan ng malalakas na alon ang bangka.

Tyempo namang nagsasagawa ng seaborne patrol ang MCS-3001 sa lugar.

Agad nailigtas ang mga sakay ng bangka at pinagkalooban ng rescue assistance.

Isinailalim din sila sa pagsusuri at lahat sila ay maayos ang kondisyon.