Dalawa pang kaso ng COVID-19 naitala sa Batanes

Nakapagtala pa ng dalawang kaso ng COVID-19 sa lalawigan ng Batanes.

Ayon sa abiso ng Batanes COVID19 Task Group dalawang 49 anyos na babae ang nagpositibo sa sakit.

Ang isa ay residente ng Basco at ang isa ay residente Sabtang na kapwa dumating sa Batanes noong March 20 lulan ng PAL flight.

Kapwa din sila close contacts ng pasyenteng tinaguriang si “B007”.

Ayon sa abiso, kapwa asymptomatic ang dalawa. Ang isa ay nasa Batanes Resort Isolation Facility at ang isa ay nasa Sabtang Quarantine Facility.

Dahil sa dagdag na dalawang kaso, umakyat na sa siyam ang kabuuang bilang ng naitatalang kaso ng COVID-19 sa Batanes.