Love triangle nauwi sa pananagga sa Sanchez, Mira Cagayan

Dahil sa isyu ng love triangle, isang lalaki ang tinaga ang kaniya umanong karibal sa bayan ng Sanchez Mira sa lalawigan ng Cagayan,

Ayon sa Cagayan Police Provincial Office (CPPO), nakakulong ang suspek na si Andres Matias Liban Jr., 30 anyos, dahil sa pananaga nito sa biktimang si Medard Apostol Dela Cruz, 32 anyos.

Sa imbestigasyon ng Sanchez Mira Police, nangyari ang insidente sa Sitio Kalingkingan, Brgy. Marzan ng nasabing bayan.

Nabatid na dumalo sa lamay ang biktimang si Dela Cruz at nakipag-inuman at nang malasing ay pinuntahan nito ang suspek na si Liban at nagkaroon ng pagtatalo ang dalawa.

Ang pagtatalo ay nauwi sa pananaga ni Liban kay Dela Cruz ng dalawang beses, isa sa ulo at isa sa kanang kamay.

Nagawang makatakbo ng biktima at nakahingi ng tulong sa mga residente kaya nadala siya sa Northern Cagayan District Hospital.

Nadakip naman ang suspek na si Liban at nakumpiska ang bolo na ginamit niya sa pananaga.

Sa ginawang pagsisiyasat ng kapulisan, nag-ugat ang away ng dalawa dahil umano sa love triangle.

Mahaharap si Liban sa kasong Frustrated Homicide, habang nagpapagaling naman ngayon sa kanyang mga natamong sugat ang karibal nitong biktima.