76 na job order workers sa Caloocan tumanggap ng bisikleta

Pinagkalooban ng bisikleta ni Caloocan City Mayor Oscar Malapitan ang nasa 76 na job order workers ng Pamahalaang Lungsod ng Caloocan.

Kaugnay ito ng naunang inanunsyo ni Malapitan na ipamamahagi niya sa mga job order worker ang 100 bisekleta na donasyon ni Ginoong Elton Ang, dating presidente ng Caloocan Industrial at may-ari ng Masterbatch Philippines Incorporated.

Ayon kay Malapitan, kinakailangan lamang na magpadala ng sulat sa tanggapan niya para mapiling benepisyaryo ng programa.

Umabot sa 76 na job order workers ang unang nagpadala ng liham.

Nagpasalamat naman ang alkalde kay Ang sa ipinagkaloob na mga bisikleta.

“Ako ay taos-pusong nagpapasalamat sa donasyong ito ni Mr. Elton Ang para sa ating Pamahalaang Lungsod. At bilang pagkilala sa serbisyo ng ating mga job order, sa kanila ko naisip ipamahagi ang mga bisekletang ito. Nais natin silang matulungan at iparamdam sa kanila ang kanilang kahalagahan bilang mga lingkod-bayan ng Caloocan,” ayon kay Malapitan. (D. Cargullo)