TBS members tinutunton ng NCRPO, recruitment ng minors pipigilan
Pinaigting ng National Capital Region Police Office (NCRPO) ang mga hakbang nito upang matunton ang mga miyembro ng grupong tinatawag na True Brown Style (TBS) at mapigilan ang posibleng kriminal na aktibidad sa Metro Manila.
Ito ay alinsunod sa direktiba ni Department of the Interior and Local Government (DILG) Secretary Jonvic Remulla, sa gabay ni PNP Chief PGen. Jose Melencio Nartatez Jr., na naglarawan sa TBS bilang isang matagal nang umiiral na organisasyon na nagmula sa United States at kalaunan ay nagkaroon ng presensya sa Pilipinas.
Unang sinabi ng kalihim na iniuugnay ang grupo sa mga kriminal na aktibidad kabilang ang umano’y pagnanakaw sa mga convenience store bilang bahagi ng initiation ng mga miyembro nito.
Ikinabahala pa ni Sec. Remulla ang mga ulat na ang grupo ay binubuo ng mga young adult habang hinihikayat o hinuhubog umano ang mga kabataang nasa edad 14 hanggang 15 upang gawing mga kriminal.
Kaugnay nito, inatasan ni NCRPO Officer-in-Charge Police Brigadier General Christopher Abrahano ang lahat ng district director at mga kinauukulang police unit na palakasin ang pangangalap ng intelelihensiya, koordinasyon, at mga operasyon ng pulisya upang matukoy ang mga miyembro ng grupo, alamin ang kanilang mga aktibidad, at mapigilan ang patuloy na recruitment.
“We are taking this matter seriously. Our district directors are directed to do everything necessary, within the bounds of the law, to locate individuals involved in criminal activities and prevent this group from victimizing our communities, particularly our young people” sabi ni PBGen. Abrahano
Binigyang-diin ni PBGen. Abrahano na hindi lamang pag-aresto sa mga indibidwal na gumagawa ng krimen ang tututukan ng police response, kundi maging ang pagpigil sa recruitment at pagsasamantala sa mga menor de edad.
“What is especially alarming is the reported grooming of teenagers into criminal activities. We will work closely with local government units, schools, barangay officials, parents and other stakeholders to protect our youth from being recruited into criminal groups,” ani PBGen. Abrahano.
Pinalalakas din ng NCRPO ang pangangalap ng impormasyon at pakikipag-ugnayan sa mga komunidad sa mga lugar kung saan maaaring matukoy ang mga pinaghihinalaang miyembro o aktibidad na may kaugnayan sa TBS.
“We will not act on mere suspicion or association. Our personnel will gather evidence, validate information and pursue appropriate police action against those who are found to be involved in criminal acts,” ayon sa NCRPO Chief.
Nanawagan din siya sa mga magulang, lider ng komunidad at mga residente na agad ireport sa pulisya ang anumang impormasyon hinggil sa recruitment ng mga menor de edad o iba pang kriminal na aktibidad.
“The community is our partner in keeping our young people away from criminality. If you have information about recruitment, criminal activities or individuals involved in these acts, report it to the nearest police station or through unified 911 hotline . Let us intervene before our children are drawn deeper into a life of crime,” pahayag ni PBGen. Abrahano.
Ayon sa NCRPO, layunin nitong mapanatili ang kapayapaan at kaayusan, maprotektahan ang mga komunidad, at mapigilan ang pagsasamantala o pagre-recruit sa mga kabataan para sa mga kriminal na aktibidad sa Metro Manila.(Bhelle Gamboa)
