MMDA nakipagpulong sa DOE, Meralco at Mspectrum, Inc. para sa solar energy

Nakipagpulong ang Metropolitan Manila Development Authority (MMDA) sa mga kinatawan ng Department of Energy (DOE), Meralco, at Mspectrum Inc. upang talakayin ang mga posibleng partnership para sa paggamit ng solar energy sa mga pasilidad ng MMDA.

Kabilang sa tinalakay sa pulong ang panukalang solar energy project na makikinabang ang MMDA Motorcycle Riding Academy (MRA) at MMDA Heritage Walkway sa Pasay City.

Maaari rin itong magsilbing charging hub para sa mga electric vehicle ng ahensya, kabilang ang mga libreng shuttle bus sa ilalim ng MMDA Love Bus Program. Sa pamamagitan nito, magagamit ang solar energy bilang karagdagang mapagkukunan ng kuryente para sa mga sasakyang ginagamit sa serbisyo publiko.

Malaking tulong din ang proyekto dahil matatagpuan ito sa bahagi ng EDSA, kung saan mas maraming tao ang makakakita sa paggamit ng renewable energy at sa pagsisikap ng MMDA na isulong ang mas malinis na enerhiya. (Bhelle Gamboa)