Mga Pinoy sa Indonesia pinag-iingat dahil sa volcanic ash

Pinayuhan ng embahada ng Pilipinas ang mga Pinoy sa Indonesia na maging maingat kasunod ng pag-aalburuto ng bulkan na nagdudulot ng volcanic ash sa iba’t ibang parte ng bansa.

Ayon sa abiso, ang serye ng naitalang pagputok ng Mount Anak Krakatau ay nagdulot ng volcanic ash sa western part ng Java Island partikular sa mga probinsya ng Banten, West Java at Special Capital Region ng Jakarta.

Dahil dito, pinapayuhan ang mga Pinoy na manatili lamang sa loob ng kanilang mga tahanan hangga’t maaari.

Tiyakin ding nakasara lagi ang mga bintana at pintuan.

Magsuot ng N95 o KN95 mask at goggles o anumang eye protection kapag lalabas ng bahay.

At uminom ng maraming tubig para maprotektahan ang lalamunan.

Kung kinakailangan ng agarang tulong, maaaring tumawag o makipag-ugnayan sa Philippine Embassy. (DDC)