Viral squishy dumpling toys ipinagbawal sa UK dahil sa taglay na kemikal

Inalert ng Toxics watchdog na BAN Toxics ang mga consumer sa pagbili ng viral Squishy Dumping Toys na available ngayon sa merkado at viral din online.

Ayon sa BAN Toxics, ang naturang produkto ay pinatawan ng ban ng UK Government noon pang buwan ng Hunyo dahil sa pagtataglay nito ng delikadong kemikal.

Ang produkto ay ibinebenta sa mga retail store at online shopping platforms sa Pilipinas at nagkakahalaga ng 55 hanggang 155 pesos.

Ayon sa UK Office for Product Safety and Standards, may serious chemical risk ang produkto dahil ang outer layer nito ay mayroong sobra-sobrang concentration ng benzene na kapag nalanghap ay maaaring magdulot ng irritation sa mata, ilong, at lalamunan.

Ang pagkakalantad sa mataas na antas ng benzene ay maaari ding magdulot ng burning sensation sa digestive tract at skin irritation.

Ayon kay Thony Dizon, Advocacy and Campaign Officer ng BAN Toxics, delikado ito lalo sa mga bata dahil maaaring maisubo nila ang laruan.

Dahil dito Nanawagan ang BAN Toxics sa FDA, DTI, at LGUs na magkasa ng post-marketing surveillance, confiscation operations, at mag-isyu ng public health advisories laban sa nasabing laruan. (DDC)