Panukalang ordinansa na nagsusulong sa kaligtasan ng mga paaralan at proteksiyon ng mag-aaral, suportado ng Las Piñas City Council

Ipinakilala ni Education Committee Chairperson Councilor Alelee Aguilar ang panukalang Las Piñas City Safe Schools and Child Protection Ordinance of 2026, isang komprehensibong hakbang sa pagpapalakas ng kaligtasan ng mga estudyante, mental health, anti-bullying at pagpigil sa karahasan sa lahat ng institusyong pang-edukasyon sa buong lungsod.

Ang mungkahing ordinansa ni Konsehal Alelee Aguilar ay sinuportahang lahat ng mga miyembro ng Sangguniang Panlungsod sa kasagsagan ng presentasyon sa Las Piñas City Council Hall. Ito ay sumasalamin sa nagkakaisang tugon ng lungsod sa mga nakalipas na insidente ng pambubully sa loob ng mga eskwelahan, karahasan at pamamaril na kinasangkutan ng kabataan na nagdulot ng alalahanin at pangamba sa bansa.

Ang hakbang na ito ay nakagawa ng pinagsama-samang balangkas para sa kaligtasan ng paaralan sa pamamagitan ng mas malakas na child protection systems, school-based mental health and psychosocial support services, behavioral threat assessment teams, anonymous reporting mechanisms, violence prevention programs at restorative justice interventions para sa mga batang nasa panganib. Nakagawa rin ito ng Las Piñas City School Safety and Student Wellness Council para sa koordinasyon ng mga polisiya at programang kinabibilangan ng mga eskwelahan, barangay, magulang, mga ahensiyang tagapagpatupad ng batas, propesyunal sa kalusugan at stakeholders sa komunidad

Sinabi ni Konsehal Aguilar na ang naturang ordinansa ay magpapatibay ng prebensiyon, nakasentro sa kabataan at pangkalahatang paglalapit sa komunidad, na magbibigay importansiya sa maagang interbensyon o pamamagitan, pakikipag-ugnayan sa pamilya at rehabilitasyon kasama na ang pananagutan.

“If we truly want safer schools, we must invest not only in security but also in our children’s mental health, positive values and strong partnerships among families, schools, government and the community. Every child deserves to learn in an environment free from fear, violence and bullying,” pahayag ni Kons Aguilar.

Kapag naging batas, ang ordinansang ito ay inaasahang magiging isa sa pinaka-komprehensibong panlokal na mga polisiya sa bansa para sa kaligtasan sa paaralan, proteksiyon ng kabataan at kapakanan ng mga estudyante. (Bhelle Gamboa)