Atty. Jesus Falcis sinuspinde ng Korte Suprema dahil sa bulgar na tweet noong 2018

Pinatawan ng isang taong suspensyon ng Korte Suprema si Atty. Jesus Nicardo Falcis III matapos itong ireklamo ng isang dating business partner ni Kris Aquino.

Ayon sa Supreme Court, guilty si Falcis sa simple misconduct at bawal itong mag-practice ng law sa loob ng isang taon.

Ang kaso laban kay Falcis ay isinampa ng isang Jason Bantao, dating kasosyo ni Kris Aquino sa negosyo kaugnay ng post ng abogado noong taong 2018 sa X na dating Twitter kung saan nagbitiw ito ng bulgar at hindi magagandang salita laban aniya ay mga “dilawan”.

Unang napatunayan ng Integrated Bar of the Philippines na lumabag si Falcis sa Code of Professional Responsibility and Accountability dahil sa paggamit ng offensive language pero multa at reprimand lamang ang inirekomendang parusa ng IBP.

Sumang-ayon ang SC sa IBP pero mas binigatan nito ang parusa kay Falcis dahil ayon sa korte, bilang abogado, dapat ay mapanatili ang paggamit ng dignified, gender-fair, child and culturally-sensitive language sa kanilang trabaho o maging sa personal na usapin.

Nagpaalala din ang SC sa mga abogado na maging maingat sa mga ipino-post sa social media na mayroong mas malawak na audience at mas marami ang makakabasa. (DDC)