Rehab sa Maharlika Highway sa Samar matatapos sa Agosto

Inaasahang matatapos na sa buwan ng Agosto ang rehabilitasyon ng Maharlika Highway sa Pinabacdao, Samar.

Ayon sa Presidential Communications Office, mula sa tatlong oras na biyahe at magiging 1 hour and 45 minutes na lang ang biyahe sa pagitan ng Tacloban City at Catbalogan City kapag natapos na ang kalsada.

Nag-inspeksyon si Pangulong Ferdinand Marcos sa proyekto kasama ang bagong talagang general manager ng PTV-4 na si Lino Cayetano.

Sa pag-inspeksyon ni Pangulong Marcos, tiniyak nito ang mataas na kalidad ng proyekto upang mapabuti ang interconnectivity, mapabilis ang paggalaw ng mga tao at produkto, at mapalakas ang mga oportunidad sa ekonomiya sa rehiyon.

Inaasahan ding mababawasan ang gastos sa transportasyon, mapapahusay ang logistics para sa mga magsasaka at negosyante, at magiging mas madali ang pag-access sa edukasyon, serbisyong pangkalusugan, at iba pang mahahalagang serbisyo, at magiging mas ligtas at mas maaasahan rin ang pagdaan ng mga relief at recovery operations sa panahon ng kalamidad. (DDC)