Bayanihan sa Barangay ng MMDA dinala sa Muntinlupa City
Naghatid ng serbisyo ang Metropolitan Manila Development Authority (MMDA) sa pamamagitan ng programang “Bayanihan sa Barangay” sa Barangay Sucat sa lungsod ng Muntinlupa bilang bahagi ng pinaigting na kampanya ng ahensiya at mapalakas ang disiplina sa komunidad, lalo na sa usapin ng waste management.
Sa pagtutulungan ng mga tauhan ng ahensiya mula sa iba’t ibang opisina nagsagawa ng sidewalk clearing operations, yellow box painting, paglalagay ng traffic signages, misting operations bilang bahagi ng dengue prevention efforts, at trimming and pruning of trees para sa kaligtasan ng publiko.
Nagkaroon ng information drive upang makapagbigay ng kaalaman tungkol sa solid waste management, anti-smoking, anti-littering, disaster preparedness, at trash to cash programs.
Maaaring makapag-uwi ng grocery items ang mga residente kapalit ng kanilang recyclables sa pamamagitan ng Mobile Materials Recovery Facility.
Mayroon din one-stop shop query service para naman ma-check ng mga motorista kung may violations ang kanilang sasakyan.
Samantala, nagsagawa rin ng Bayanihan sa Estero kung saan masinsinang nilinis ang Buli Sucat River sa Muntinlupa City. Kabilang sa mga isinagawang gawain ay ang dredging at drainage declogging operations upang tanggalin ang mga nakabarang basura tulad ng plastik, sanga, at iba pang solid waste.
Layunin ng inisyatibong ito na linisin ang mga daluyan ng tubig, maiwasan ang pagbara, at mabawasan ang panganib ng pagbaha lalo na sa panahon ng tag-ulan.
Binigyang-diin ni MMDA General Manager Usec. Nicolas Torre III na namahalaga ang pagkakaroon ng sariling disiplina at responsibilidad sa wastong pamamahala ng basura. Aniya, ang patuloy na pagtatapon ng basura sa kalsada at estero ang isa sa pangunahing sanhi ng pagbaha, kaya’t kinakailangan ang aktibong pakikiisa ng publiko upang mapanatiling malinis ang kapaligiran.
Sinabi naman ni Muntinlupa City Mayor Rufino Biazon na ang pakikiisa ng komunidad sa mga programa ng pamahalaan ay susi upang mapanatili ang kaayusan at kalinisan sa lungsod. Hinikayat niya ang mga residente na maging responsable sa pagtatapon ng basura at aktibong makibahagi sa mga inisyatibo para sa isang mas malinis at ligtas na Muntinlupa. (Bhelle Gamboa)
