Mga boteng na-rekober sa bangka ng China sa West PH Sea positibo sa cyanide

Kinumpirma ng National Security Council na ang mga boteng nakuha ng Philippine Navy mula sa mga bangka ng China sa West Philippine Sea ay nag-positibo sa cyanide.

Ang nasabing mga bangka na tinatawag na “Chinese sampans” ay nakitang nag-ooperate malapit sa BRP Sierra Madre sa Ayungin Shoal noong February 2025 at Oct. 24, 2025.

Ayon kay NSC spokesperson Assistant Director General Cornelio Valencia Jr., sa isinagawang laboratory analysis ng Forensic and Scientific Research Service ng NBI, ang mga kulay dilaw na bote na nakuha sa mga bangka ay nagtataglay ng cyanide na highly toxic chemical at delikado sa tao at sa marine ecosystems.

Sinabi ni Valencia na ang paggamit ng cyanide ng bangka galing China ay ilegal at banta sa mga tauhan ng Phiilppine Navy na nasa BRP Sierra Madre.

Delikado din ito sa marine environment sa West Philippine Sea at sa kabuhayan ng mga mangingisdang Pinoy.

Dahil sa naging resulta ng pagsusuri ng NBI, sinabi ni Valencia na inatasan na ng NSC ang Armed Forces of the Philippines, Philippine Coast Guard, at iba pang ahensya na paigtingin ang maritime domain awareness, at pagpapatrulya sa West Philippine Sea. (DDC)