Operasyon ng e-sabong nabuwag sa Agusan, 22 ang timbog

Sinalakay ng mga tauhan ng National Bureau of Investigation ang isang arena sa Tubay, Agusan del Norte na ginagamit sa ilegal na online sabong.

Ayon sa NBI, nagkasa muna ng surveillance ang kanilang mga tauhan matapos ang mga natanggap na sumbong patungkol sa operasyon ng sabungan sa nasabing lugar.

Nakumpirma ng ahensya na regular na nagsasagawa ng sabong sa arena kada Lunes at Martes na ginagamit para sa E-sabong operations.

Naaresto sa nasabing operasyon ang dalawampu’t dalawang katao kabilang ang cockpit operator, supervisor, system provider manager, game master, announcer, sweeper, gaffer, kristo, largador, handler, at mga mananaya.

Sasampahan sila ng reklamong paglabag sa Presidential Decree No. 449 o Cockfighting Law of 1974 at R.A. No. 10175 o Cybercrime Prevention Act of 2012. (DDC)