Patuloy na suplay ng tubig ngayong Holy Week tiniyak ng Manila Water

Siniguro ng Manila Water ang tuloy-tuloy na suplay ng tubig sa kanilang mga customer sa East Zone ngayong Holy Week.

Ayon sa Manila Water, ngayong matindi na ang init ng panahon, tiyak na tataas ang konsumo sa tubig dahil sa Holy Week break at summer break.

Sa kabila nito, sinabi ng water company na handa sila na maihatid ang pangangailangan ng kanilang customer.

Ibinida ng Manila Water ang dagdag na sources ng raw water kabilang ang Wawa–Calawis Water Supply System na magbibigay ng dagdag na suplay sa eastern Metro Manila at Rizal Province.

Ang Calawis Water Treatment Plant ay mayroong capacity na hanggang 80 million liters per day at sinusuportahan ito ng Upper Wawa Dam at ng Tayabasan Dam.

Karagdagan ito sa 110 million liters per day na kapasidad ng Cardona Water Treatment Plant na ang tubig ay nagmumula sa central portion ng Laguna Lake. (DDC)