Ibang government issued ID pwede pang gamitin sa pag-claim ng social pension sa DSWD

Nilinaw ng Department of Social Welfare and Development na tatanggapin pa din ang iba pang valid na ID sa pag-claim sa Social Pension para sa Indigent Senior Citizens.

Paliwanag ng ahensya, hinihikayat lamang nila ang mga benepisyaryo na kumuha at gumamit ng PhilSys-issued National ID bilang kanilang Primary ID.

Kung ang benepisyaryo ay wala pang National ID, mananatiling valid at tatanggapin pa rin ang iba pang government-issued IDs bilang kanilang Secondary ID.

Nakikipag-ugnayan na din ang DSWD Field Offices sa Philippine Statistics Authority para matulungan at gabayan ang lahat ng mga benepisyaryo na hindi pa rehistrado sa PhilSys.

Layunin nito na matiyak na ang bawat Social Pensioner ay magkaroon ng kanilang sariling National ID para sa mas mabilis na serbisyo. (DDC)