Libreng Sakay sa MRT at LRT inihirit ng Akbayan

Hinikayat ni Akbayan Partylist Rep. Perci Cendaña ang Department of Transportation na magbigay ng libreng sakay sa LRT at MRT para mahikayat ang publiko na mag-commute na lang kaysa gumamit ng sariling sasakyan.

Makatutulong ito ayon kay Cendaña para dagdag pagtitipid sa konsumo ng langis.

Dahil sa sobrang taas ng presyo ng produktong petrolyo, malaking tulong aniya sa publiko kung libre na ang sakay sa MRT at LRT kaysa naman ang gumastos sila ng sobra para sa diesel at gasolina ng kanilang sasakyan.

Ayon sa mambabatas, ngayong may krisis sa Middle East na nagresulta sa mataas na presyo ng produktong petrolyo, dapat ay tutukan ng pamahalaan ang pagpapabuti sa mass transportation.

Ito ay para mas gustuhin na aniya ng mga motorista ang mag-commute na lang sa halip na gumamit ng kanilang mga sasakyan papasok sa trabaho. (DDC)