Malasakit na serbisyo at pasensya para sa OFWs hinirit ni Sen Tulfo sa DMW

Hinimok ni Senator Erwin Tulfo, Chairperson ng Senate Committee on Foreign Relations, ang Department of Migrant Workers (DMW) na pairalin ang mas mahabang pasensya, malasakit, at pag-unawa sa pakikitungo sa overseas Filipino workers (OFWs) na lumalapit sa ahensiya para sa agarang tulong.

Sa kanyang mensahe sa flag-raising ceremony ngayong umaga, March 09, 2026, sa DMW Central Office, binigyang-diin ng senador ang sakripisyong ginagawa ng mga OFW upang mabigyan ng mas magandang kinabukasan ang kanilang mga pamilya.

“Sa bawat OFW na nasa ibang bansa, may pamilyang umaasa sa kanila sa Pilipinas. They dream of giving their families a better life, at sa bawat sakripisyo nila, may tungkulin po tayong gagampanan,” ani Tulfo.

Binigyang-diin din niya na ang tunay na serbisyo publiko ay hindi lamang nasusukat sa bilis ng proseso kundi sa malasakit at pakikinig sa mga OFW, lalo na sa kasalukuyang tensyon sa Middle East kung saan maraming Pilipinong manggagawa ang nakararanas ng pangamba at kawalan ng katiyakan.

“Because at the heart of public service is one simple truth: when we serve our OFWs well, we serve the Filipino nation as well,” pagtatapos niya. (Bhelle Gamboa)