90 pang OFWs mula sa UAE, nakauwi na sa bansa

Ligtas na dumating sa bansa ang nasa 90 na overseas Filipino workers (OFWs) mula sa United Arab Emirates (UAE) sakay ng Emirates Airline EK 334 nang lumapag sa Ninoy Aquino International Airport Terminal 3, Linggo ng gabi, Marso 8, 2026.

Sinalubong nina Department of Migrant Workers (DMW) Secretary Hans Leo J. Cacdac at Overseas Workers Welfare Administration (OWWA) Administrator Patricia Yvonne Caunan ang mga dumating na OFW, kasama ang Department of Social Welfare and Development (DSWD), MIA Medical Team, at ang New NAIA Infratructure Corp. (NNIC).

Ayon sa DMW na kabilang sa mga nakauwi ang 33 OFWs na sinamantala ang alok na repatriation ng pamahalaan, habang ang iba ay mga na-stranded na OFW sa Dubai.

Binigyang-diin ni Secretary Cacdac ang pagbibigay ng gobyerno ng lahat ng uri ng “pre-repatriation assistance” sa lahat ng umuwing OFW, at financial assistance na bahagi ng “post-repatriation assistance” sa kanila.

Simula noong Marso 5, umabot na sa 399 OFWs at 12 dependents ang nakauwi sa bansa mula nang sumiklab muli ang krisis sa Gitnang Silangan noong Pebrero 28, 2026. (Bhelle Gamboa)