NACC nanawagan ng total ban sa mga page na ginagamit sa Child Trafficking

Umapela ang National Authority for Child Care o NACC sa Meta PH na agad itake-down ang mga Facebook groups at accounts na ginagamit sa online child trafficking partikular sa bentahan ng sanggol.

Sa kaniyang pahayag sinabi ni NACC Undersecretary Janella Ejercito na maaari ding mapanagot ang Meta sa paglabag sa Expanded Anti-Trafficking in Persons Act of 2022 kapag napatunayang nagpapabaya sila sa usapin.

Bahagi aniya ng moral obligation ng mga social media platform ang magself-regulate at tiyaking hindi nagagamit ang kanilang serbisyo sa krimen.

Kamakailan naaresto ang mag-live in partner sa San Pedro City, Laguna dahil sa pagtatangkang ibenta ang five-day old nilang anak sa halagang thirty-five thousand pesos.

Na-rescue din sa operasyon ang tatlo pa nilang mga anak na edad dalawa, onse at dose. (DDC)