Higit 1.3 million na halaga ng shabu nasabat ng SPD-DEU sa Taguig City

Sa walang tigil na kampanya laban sa paglaganap ng ilegal na droga, nadakip ng mga tauhan ng Southern Police District’s District Drug Enforcement Unit (SPD-DEU) ang dalawang bagong High-Value Individuals (HVIs) at nakumpiska ang P1,360,000.00 na halaga ng hinihinalang shabu sa isinagawang buy-bust operation sa estero sa tapat ng TESDA Training Ground construction site na matatagpuan sa Purok 5, Barangay Napindan, sa Taguig City.

Nasa kustodiya ng pulisya ang nga suspek na sina alyas “Viv,” 53-anyos, at alyas “Anthony”, 30-anyos, kapwa nakatira sa Cainta, Rizal.

Naging matagumpay ang anti-drug operation ng operatiba ng DDEU sa pangunguna ng kanilang pinuno na si Maj Cecili Tomas Jr. Sa koordinasyon District Intelligence Division (DID-SPD) at Taguig City Police Sub-Station 5.

Sa kasagsagan ng operasyon,isang police poseur buyer ang nakabili umano siya ng droga sa mga suspek na nagresulta ng kanilang agarang pagkaaresto.

Nasabat ng otoridad ang 200 na gramo ng umano’y shabu, buy-bust money, envelope, at android phone na pinaniniwalaang ginamit sa drug transactions.

Sasampahan ng kasong paglabag sa Republic Act 9165 (Comprehensive Dangerous Drugs Act of 2002) ang mga suspek.

Binigyang papuri ni BGen Randy Y. Arceo, District Director ng SPD ang mga operatiba ng DDEU at ng partner units nito sa kanilang wasto at dedikadong operasyon.

Inihayag din ng opisyal na mananatili ang SPD na mapagmatyag sa kanyang misyon na buwagin ang kalakaran ng drug networks at protektahan ang komunidad laban sa banta ng ilegal na droga. (Bhelle Gamboa)