DND tiniyak ang kahandaan sa paglilikas ng mga OFW

Tiniyak ng Department of National Defense ang kahandaan nito at ng Armed Forces of the Philippines na tumulong sa paglilikas ng mga Pinoy sa mga bansang apektado ng kaguluhan sa Middle East

Ayon sa pahayag ng DND, nakasubaybay ito sa sitwasyon sa Gitnang Silangan, kasama ang Department of Foreign Affairs, Department of Migrant Workers at iba pang ahensya ng gobyerno.

Nananatili ring handa ang Sandatahang Lakas ng Pilipinas na tumugon sa mga pangangailangan ng mga kababayan Pinoy kasama na ang paglikas sakaling ito ay ipag-utos.

Sa kasalukuyan sinabi ng DND na ang gulo ay nananatili lamang sa Gitnang Silangan at walang inaasahang direktang banta sa teritoryo ng Pilipinas.

Hinikayat ng DND ang publiko na maging mapagmatyag laban sa disinformation.

Sa ngayon, pangunahing prayoridad ng pamahalaan ang kaligtasan ng mga Pinoy sa ibang bansa. (DDC)