Lalaki timbog sa baril sa Muntinlupa City

Kalaboso ang sinapit ng isang lalaki mtappos mahulihan ng baril sa gitna ng isinasagawang anti-criminality operation ng Alabang Police Sub-Station ng Muntinlupa City Police Station, sa 7C PNR Site, Barangay Alabang.

Sa report na natanggap ni Southern Police District (SPD) District Director, BGen Randy Arceo, nagpapatrulya ang mga tauhan ng Alabang Police Sub-Station, sa ilalim ng superbisyon ni Col Robert Domingo hepe ng Muntinlupa CPS, may isang kahina-hinalang indibiduwa ang naiulat na may dalang baril na nagdulot ng takot at pangamba sa mga residente sa lugar.

Mabilis na nirespondehan ng otoridad ang nasabing sumbong ng concerned citizen kung saan positibong natukoy at nasakote ang suspek na si alyas “Jiro,” 28-anyos, residente ng Brgy. Bayanan ng naturang lungsod.

Nakumpiska kay alyas Jiro ang isang caliber .38 revolver na walang serial number ar dalawang bala ng baril na sanhi ng agarang pagkaaresto nito.

Dinala ang suspek sa Station Investigation and Detective Management Section (SIDMS) para sa kaukulang imbestigasyon at pagsasampa ng kaukulang kaso.

Kinikilala ng SPD ang kolaborasyon ng komunidad na nananatiling importante para sa kaligtasan ng publiko at ang patuloy na maigting na anti-criminality operations nito sa mga nasasakupang lugar.

Mahigpit na panawagan ng SPD Chief sa mga residente na manatiling mapanuri o mapagmatyag at ireport agad sa otoridad ang anumang kahina-hinalang aktibidad. (Bhelle Gamboa)