Alegasyon ng “fuel dumping” ng China itinanggi ng PH Coast Guard

Kinondena ng Coast Guard District Palawan ang pagpapakalat ng pekeng video online kung saan pinalalabas na nagtatapon umano ng langis ang kanilang barko sa Kanduli Shoal.

Ayon sa pahayag ng CGD Palawan, sa nasabing video ay nagsasagawa ng lehitimong fuel support ang kanilang mga tauhan para tulungan ang fishing banca na ZAYDEN IVAAN.

Humingi ng tulong ang mga mangingisda dahil sa isang galon na lang ang natitira sa kanilang krudo.

Paliwanag ng Coast Guard, ang fuel transfer ay ginamitan nila ng tali dahil hindi makalapit ang fishing banca sa kanilang barko dahil sa malakas na hampas ng alon.

Sa video ng China state-controlled media sinabing nagtatapon ang barko ng Coast Guard ng mga itim na barrel sa katubigan. (Dona Dominguez-Cargullo)