P643M grant ng JICA para sa Rice Processing Project sa Isabela aprubado na

Pirmado na ang 1.7 Billion Japanese Yen o katumbas ng 643 million pesos na halaga ng grant para sa makabagong rice processing system sa Cauayan City sa Isabela.

Nilagdaan ang kasunduan sa pagitan ng Department of Agriculture at ng Japan International Cooperation Agency na layong mapondohan ang proyekto ng National Food Authority sa pagtatayo ng high-capacity mechanical grain dryers, multi-stage rice mill, at malalaking grain silos.

Kapag natapos ang proyekto inaasahang mas tataas pa ang kapasidad ng NFA sa pagbili, at pagproseso ng palay.

Layunin din ng proyekto na tugunan ang matagal nang kakulangan sa pasilidad sa “post-harvest” na nagdudulot ng malaking kabawasan sa produksyon ng bigas sa bansa.

Tinatayang aabot limanglibong magsasaka sa Cauayan City at mga karatig-bayan sa Isabela ang direktang makikinabang sa proyekto.

Ang probinsiya ng Isabela ay pangalawa sa buong Pilipinas na may pinakamalaking produksyon ng palay na umaabot sa mahigit 1.5 million metric tons kada taon. (DDC)