Jay Sonza at isang YouTuber sinampolan ng NBI dahil sa pagpapakalat ng fake news
Sinampahan ng reklamo ng National Bureau of Investigation sa Department of Justice ang dating brodkaster na si Jay Sonza at YouTuber na si Jeffrey Luces Celiz dahil sa pagpapakalat nila ng pekeng medical information patungkol kay Pangulong Ferdinand Marcos Jr.
Ayon kay NBI Director Atty. Angelito Magno, inihain ang reklamo bilang resulta ng isinagawang targeted cyber-surveillance operation ng NBI-Cybercrime Division kung saan natukoy sina Sonza at Celiz bilang primary sources ng misinformation.
Noong January 28 at 29, 2026 nai-rekord ng NBI ang online posts na nagpapakita ng CT-scan report na sinamahan ng larawan ni Pangulong Marcos.
Kahit tinanggal kalaunan ang posts, nagawa ng NBI na makakuha ng ebidensya gaya ng digital forensic screenshots.
Reklamong Cyber Libel sa ilalim ng R.A. 10175 o Cybercrime Prevention Act of 2012 at Unlawful Use of Means of Publication sa ilalim ng Article 154 ng Revised Penal Code ang isinampang reklamo laban sa dalawa. (DDC)
