MMDA nakibahagi sa “Benteng Bigas, Meron Na” Rice Project Expansion Rollout sa Metro Manila
Nakibahagi ang Metropolitan Manila Development Authority (MMDA) sa paglulunsad ng programang “Benteng Bigas, Meron Na” Rice Project Expansion Rollout sa Metro Manila ngayong araw sa San Juan City.
Sinabi ni MMDA Chairman Atty. Don Artes na buo ang suporta ng ahensiya sa pamahalaan na gawing abot-kaya ang pangunahing pangangailangan ng bawat Pilipino.
Layunin ng flagship food security project ng administrasyon ni Pangulong Ferdinand Marcos Jr., na mailapit ang abot-kayang bigas sa mas marami pang mamamayan upang maibsan ang gastusin ng mga pamilya.
Tutulong ang MMDA sa pag-roll out ng programa sa lahat ng 17 LGUs sa Metro Manila na kasama sa priority target areas ng Department of Agriculture sa first quarter ng 2026, saad ni Chairman Artes.
Nagpasalamat si San Juan City Mayor at MMC president Francis Zamora kay Pangulong Marcos sa pagpapalawig ng programa upang mas maraming mahihirap at bulnerableng sektor ang makinabang sa P20 kada kilo na bigas.
Ayon naman Agriculture Secretary Francisco Tiu Laurel Jr., target ng ahensiya na magtayo ng hindi bababa sa limang P20 rice outlets sa bawat lokal na pamahalaan sa National Capital Region. Tatagal ang programa hanggang June 30 2028.
Prayoridad sa programa ang senior citizens, solo parents, persons with disabilities, 4Ps beneficiaries, minimum wage earners, miyembro ng TODA, magsasaka, mangingisda at iba pang kwalipikadong grupo. (Bhelle Gamboa)
