Art Gallery ng mga alagad ng Sining sa Las Piñas City binuksan

Pormal na binuksan sa publiko ang Art Gallery ng mga Las Piñerong kasapi ng United Artists of Las Piñas (UALP) sa SM Center Las Piñas upang paunlarin ang sining sa lungsod.

Ang nasabing Art Gallery ay magsisilbing bagong espasyo para sa mga malikhaing Las Piñero para mapayabong at makilala pa ang mga natatanging sining.

Kasabay nito ang idinaos na Las Piñas Kawayan Award For Visual Arts
bilang bahagi ng Awarding of Recognition and Life Achievement na nagbibigay-parangal sa mga alagad ng sining ng lungsod na kasapi sa UALP.

Ang makabuluhang kaganapan ay dinaluhan ng pinuno ng Tanggapan ng Turismo at Kultura sa lungsod na si Mr. Paul Ahljay M. San Miguel, kasama sina Mayor April Aguilar-Nery, Konsehal Alelee Aguilar Andanar at Dir. Patrick John Mejia, bilang pakikiisa sa pagkilala sa mga pinarangalan dahil sa kanilang natatanging ambag, dedikasyon, at panghabambuhay na paglilingkod sa sining at kultura ng Las Piñas. (Bhelle Gamboa)