Mga employer hinikayat ng DOLE na payagang mag-absent ang mga empleyado kung papabakunahan ang anak

Hinihikayat ng Department of Labor and Employment ang mga employer na payagan ang kanilang mga empleyado na mag-absent sa trabaho para mapabakunahan ang kanilang mga anak sa nagpapatuloy na Ligtas Tigdas Campaign ng Department of Health.

Ayon sa inilabas na Labor Advisory ng DOLE, hinihikayat ang lahat ng pribadong sector na i-excuse ang kanilang empleyado para masamahan ang kanilang anak na makapagpabakuna.

Gayundin kung kinakailangang mag-leave para alagaan ang kanilang anak sakaling makaranas ng adverse effects o reactions pagkatapos mabakunahan.

Ayon sa DOLE, pagbalik sa trabaho kailangan lang magsumite ng empleyado ng patunay na nakapagpabakuna ang kaniyang anak.

Sa ilalim ng nagpapatuloy na kampanya ng DOH, binabakunahan ang mga batang wala pang limang taong gulang para para maprotektahan sila mula sa nakamamatay na tigdas at tigdas-hangin. (Dona Dominguez-Cargullo)