Coast Guard inilabas ang updated na bilang ng mga pasaherong sakay ng MV Kerstin 3

Matapos ang dalawang linggong imbestigasyon sa paglubog ng MV Trisha Kerstin 3 sa Basilan naglabas ng updated na datos ang Philippine Coast Guard sa bilang ng mga pasaherong sakay ng barko.

Mula sa unang iniulat na three hundred sixteen survivors, ibinaba sa two hundred ninety-three ang bilang ng mga nakaligtas, habang limampu’t dalawa na ang nasawi at nagtala din ng dalawampu’t pitong nawawala.

Sa kabuuan ayon sa PCG, ang bilang ng mga pasahero at crew na sakay ng lumubog na barko ay three hundred seventy-two.

Ayon kay PCG Spokesperson, Captain Noemie Cayabyab, nakumpirma ang nasabing bilang matapos ang consolidated verification sa pamilya ng mga biktima, PNP-SOCO, at sa Provincial Disaster Risk Reduction and Management Office.

Base sa imbestigayson, karamihan sa mga nasawi ay pawang pasahero na nakalista sa manipesto ng barko, pero mayroong anim na nakarekober na bangkay ang hindi pa nakikitalala sa ngayon.

Ang dalawampu’t pitong naitalang nawawala ay ibinase sa nagpapatuloy na imbestigasyon ng PNP-SOCO at sa pakikipag-usap sa pamilya. (Dona Dominguez-Cargullo)