Mga kandidato sa special elections sa Antipolo binalaan sa premature campaigning

Babantayan na ng Commission on Elections ang mga aspiranteng nagsumite na ng kanilang Certificate of Candidacy para sa idaraos na special elections sa ikalawang distrito ng Antipolo City.

Ayon kay Comelec Chairman George Erwin Garcia, sa sandali kasing maihain ang COC, considered na silang kandidato kaya bawal na nilang ikampanya ang sarili.

Sa February 12 pa ang pormal na pagsisimula ng campaign period para gagawing special elections kaya kung mag-iikot ang mga kandidato at mamamahagi ng campaign materials bago ang petsang ito, maituturing itong premature campaigning.

Ani Garcia, kung mapatutunayang masasangkot sa paglabag ay maaari itong maging grounds for disqualification.

Paalala ni Garcia sa mga kandidato, sundin ang umiiral na guidelines dahil mahigpit pa ring tututukan ng Comelec ang buong proseso ng isasagawang eleksyon. (Dona Dominguez-Cargullo)