Bayanihan sa Barangay project ng MMDA isinagawa sa Malabon City
Paglilinis at paghahanda para sa nalalapit na tag-ulan ang isinagawa ng Metropolitan Manila Development Authority (MMDA) sa Barangay Longos at Barangay Tonsuya, Malabon bilang bahagi ng Bayanihan sa Barangay katuwang ang lokal na pamahalaang lungsod.
Tiniyak ni Chairman Atty. Don Artes na patuloy ang suporta ng ahensiya sa mga barangay sa pamamagitan ng paglilinis, pavement marking, trimming ng mga puno, misting operations, at Mobile Materials Recovery Facility (MRF) truck para palitan ng grocery items ang mga naipon nilang basura.“Asahan ninyo po ang suporta at tulong ng MMDA, lalo na sa mga programang nakatuon sa kalinisan, kaligtasan, at kahandaan ng komunidad”, dagdag niya.
Binigyang-diin naman ni General Manager Usec. Nicolas Torre III na mahalaga ang pagkakaisa at disiplina ng bawat isa upang mapanatiling malinis at maayos ang barangay. “Nagsisimula muna ito sa atin. Kapag nagkaisa tayo, masisiguro nating hindi na babalik ang mga basura at mananatiling malinis at ligtas ang komunidad,” ayon kay Usec. Torre.
Samantala, pinasalamatan ni Mayor Jeannie Sandoval ang MMDA sa tuloy-tuloy na tulong nito sa lungsod. “Malaking tulong ang MMDA sa aming lungsod, lalo na sa paghahanda sa rainy season. Sa pamamagitan ng kanilang suporta, mas napapalakas natin ang kakayahan ng ating mga barangay na tumugon sa mga hamon ng kalamidad.”
Kasabay ng aktibidad, personal na ininspeksiyon ni Chairman Artes, GM Torre, at Mayor Sandoval ang Letre Creek, Pinagsabugan at Sukol Creek bilang bahagi ng Bayanihan sa Estero. Ilang tonelada ng plastik, bote, basura, at damit ang nahukay sa mga estero upang masiguro ang maayos na daloy ng tubig at maiwasan ang pagbaha sa lugar.
Katuwang ng MMDA sa aktibidad ang mga lokal na opisyal at tauhan ng barangay sa paglilinis at paghahanda ng komunidad para sa ligtas at maayos na kapaligiran sa panahon ng tag-ulan. (Bhelle Gamboa)
