Ika-81 Anibersaryo ng Araw ng Liberasyon ng Las Piñas ginunita

Ginunita ng Pamahalaang Lungsod ng Las Piñas at mga beterano sa pangunguna ng Las Piñas City Tourism and Cultural Office ang ika-81 anibersaryo ng Araw ng Liberasyon ng Las Piñas na ginanap mismo sa makasaysayang Veterans Monument ng Zapote nitong Pebrero 4.

Nagsimula ang pagdiriwang sa isang parada ng mga beterano kasama sina Mayor April Aguilar-Nery, Vice Mayor Imelda T. Aguilar, City Councilors Alelee Aguilar, Mac Mac Santos, Macky Saito, mga kinatawan ng Tanggapan ng Turismo at Kultura sa pamumuno ni Ginoong Paul Ahljay M. San Miguel at ang espesyal na paglahok ng Banda San Jose.

Sinundan ito ng isang maikling programa at banal na misa na inialay para sa mga beterano, na dinaluhan ng mga lokal na opisyal, mga kasaping veterans ng Veterans Federation of the Philippines, at kanilang mga pamilya bilang pagpupugay sa ipinamalas nilang kabayanihan at sa diwa ng kalayaan.

Sa talumpati ni Mayor April Aguilar, inalala nito ang naging ambag at sakripisyo ng mga beterano na lumaban para sa kalayaan noong ikalawang Digmaang Pandaigdigan o World War II. Aniya ang araw na ito ay hindi lamang pag-alala sa kasaysayan kundi pagpupugay sa mga taong nagbuwis ng lakas, tapang, at buhay para sa kalayaan na tinatamasa natin ngayon.

Personal na pinasalamatan ng alkalde ang lahat ng veterans kabilang ang Veterans Federation of the Philippines sa patuloy na pag-organisa at pag-alaga sa mga beterano.

“Kayo po ang buhay na saksi ng isang panahon ng pakikibaka para sa kinabukasan. Kayo po ay hindi namin kinalilimutan at mananatili kayong mahalagang bahagi ng ating komunidad,” wika ni Mayor Aguilar.

Sa naturang kaganapan, muling pinagtibay ang pasasalamat at paggalang ng lungsod sa mga bayani ng nakaraan na patuloy na nagbibigay-inspirasyon sa kasalukuyan at sa mga susunod na henerasyon. (Bhelle Gamboa)