Pakikipagtulungan sa simbahan at civil society groups pinaigting ng DepEd

Tiniyak ng Department of Education ang pagkikipagtulungan sa mga simbahan at civil society groups para matulungan ang mga batang hindi naaabot ng edukasyon dahil sa kahirapan o kakulangan sa oportunidad.

Sa kanyang talumpati sa 42nd National Social Action General Assembly of Caritas Philippines sa Tagaytay City, binigyang-diin ni DepEd Secretary Sonny Angara na ang reporma sa edukasyon ay nangangailangan ng tuloy-tuloy na presensya sa mga komunidad at araw-araw na pag-monitor sa mga mag-aaral at guro.

Binanggit ni Angara ang pakikipagtulungan ng DepEd sa Caritas Philippines at sa kanilang 86 diocesan social action centers sa buong bansa upang mas maraming mag-aaral ang makinabang sa mahahalagang programa tulad ng school-based feeding, learning recovery, at Alternative Learning System.

Ayon sa kalihim, ang mas pinalawak na School-Based Feeding Program ay sumasaklaw na ngayon sa lahat ng Kindergarten at Grade 1 learners sa buong bansa para masiguro ang tamang nutrisyon at mas maayos na pagkatuto ng mga estudyante.

Habang ang Alternative Learning System naman ay layong bigyang pagkakataon sa basic education ang mga out-of-school youth. (Dona Dominguez-Cargullo)