Las Piñas LGU naghatid ng agarang tulong sa mga nasunugan

Agad na kumilos ang Pamahalaang Lungsod ng Las Piñas ypang tulungan ang mga biktima matapos ang naganap na sunog sa Balite St., Ilaya, sa lungsod kahapon.

Pinangunahan ni Mayor April Aguilar ang relief distribution para sa mga pamilyang naapektuhan ng sunog, kasama ang mga department heads ng lungsod, Ilaya Barangay Captain Geny Miranda, at Elias Aldana Brgy. Chairman Eduardo Robles.

Batay sa ulat ng City Social Welfare and Development Office, anim na bahay ang nasunog na nakaapekto sa 17 pamilya o kabuuang 63 indibidwal. Ang insidente ay itinaas sa unang alarma ang sunog bandang 2:03 ng hapon kahapon at idineklarang fire out alas- 3:39 ng hapon.

Naging handa rin ang Disaster Risk Reduction and Management Office habang ang City Health Office ay nagbigay ng mga kinakailangang gamot at agarang serbisyong medikal sa mga apektadong residente.

Sa gitna ng pagsubok tiniyak ng Pamahalaang Lungsod na may agarang tulong, maayos na koordinasyon, at tuloy-tuloy na suporta para sa mga apektadong pamilya. (Bhelle Gamboa)